Автобус жүргізушісі телефонға қараймын деп, жас қызды қағып кетті. Тергеп-тексеру барысында қоғамдық көлік жүргізушісінің қозғалыс кезінде мобильдік телефонға назар аударғаны анықталған. Мамандардың сөзінше бұл дерек автобустың салонында орнатылған бейнебақылау жүйесінде жазылып қалған. Ал оқиға жаяу жүргіншінің жарақат алуымен аяқталған. 

Оқиға 9 желтоқсанда Алмалы ауданында, Төле би даңғылының бойында болған. Жаяу жүргіншілер жолағымен өтіп бара жатқан 2007 жылы туған қызды автобус қағып кеткен. Жасөспірім дереу ауруханаға жеткізілді.

Полиция департаменті аталған жағдай бойынша қылмыстық іс қозғалғанын хабарлады. Жүргізуші ұсталып, уақытша ұстау изоляторына қамалды. Ведомство өкілдері жолдағы алаңдаушылықтың, әсіресе қоғамдық көлік жүргізушілері тарапынан жіберілетін қателіктің, ауыр салдарға соқтыратынын атап өтті.

Алматы қаласы әкімшілік полициясының мәліметінше, көлік жүргізу кезінде телефон қолдану — жол қауіпсіздігіне тікелей қауіп төндіретін фактор. Тәртіп сақшылары жүргізушілерді жол қозғалысы ережелерін қатаң сақтауға шақырды.