Өнеркәсіп және құрылыс министрі Ерсайын Нағаспаев Үкімет отырысында биыл да мемлекет баспананы жалдау ақысын субсидиялауды жалғастыратынын хабарлады,-деп хабарлайды «Dalamedia» ақпараттық порталы.

Министрдің мәліметінше, өткен жылдың мамырында заңнамаға өзгеріс енгізіліп, әкімдіктердің тұрғын үйді есепке алу және бөлу функциялары Отбасы банкке берілген.

«Тұрғын үй саясатын біртіндеп енгізу азаматтардың тұрғын үй жағдайын жақсарту үшін маңызды. Өткен жылы азаматтарға шамамен сегіз мың жалдамалы тұрғын үй және 11 мыңнан астам жеңілдетілген ипотекалық несие берілді», — деді Ерсайын Нағаспаев.

Сонымен қатар, тұрғын үй туралы заңға енгізілген түзетулерге сәйкес, бұрын «сатып алу құқығы жоқ» жалдамалы үйлерді жекешелендіруге рұқсат берілген. Нәтижесінде 15 мыңнан астам азамат өткен жылы пәтерін жеке меншігіне рәсімдеген.

Жалға берілетін тұрғын үй ақысын субсидиялау арқылы 11 мыңнан астам адам мемлекеттік қолдау алған. Бұл мақсатқа республикалық бюджеттен 7,6 миллиард теңге бөлініпті. Министрдің айтуынша, биыл да жалдау ақысын субсидиялау бағдарламасы жалғасады.

Еске сала кетейік, субсидия көлемі пәтерді жалдау ақысының 50%-ын құрайды. Мысалы, үйді 300 мың теңгеге жалға алсаңыз, оның 150 мың теңгесін мемлекет өтеп береді. Бұл көмек нақты мұқтаж азаматтарға көрсетіледі.