Үкімет отырысында Премьер-министр Олжас Бектенов су саласына бөлініп жатқан орасан зор қаржының тиімділігіне күмән келтірді. Соңғы үш жылда технологияларды енгізуге 55 миллиард теңге жұмсалса, алдағы уақытта бұл мақсатқа тағы 200 миллиард теңге бағытталмақ.

Үкімет басшысы бұл шығындардың құрғақ есеп емес, нақты нәтиже беруін талап етті. "Осыдан нақты әсер бар ма? Шынымен суды үнемдедік пе, әлде бұл диқандарға берілген кезекті көмек пе?" - деп сұрақты төтесінен қойды Бектенов.

Өз кезегінде Су ресурстары және ирригация министрі Нұржан Нұржігітов үнемдеу бағытында оң динамика барын алға тартты. Министрдің дерегінше:

Биыл суды пайдалану көлемі 700 миллион текше метрге азайған;

Су үнемдеу технологияларының арқасында нақты 874 млн текше метр су сақталған;

Қуаңшылыққа қарамастан, суармалы дақылдардың өнімділігі өткен жылдармен салыстырғанда жоғарылаған.

Десе де, Премьер-министр бұл цифрларды халыққа қарапайым әрі түсінікті тілде жеткізу қажеттігін баса айтты. Оның пайымынша, бюджет миллиардтарының әрбір теңгесі суды тиімді басқаруға және нақты үнемге жұмыс істеуі тиіс. Сонымен қатар, жиында елдегі қалалар мен ауылдардың ауыз сумен қамтылу деңгейі 100 пайызға жеткені хабарланды.