Өзбекстан билігі мемлекеттік басқаруда цифрлық технологияларды кеңінен енгізу аясында 2,1 мыңнан астам шенеуніктің қызметін қысқартпақ. Тиісті жарлыққа ел президенті Шавкат Мирзиёев қол қойды. Құжат Lex.uz порталында жарияланды.

Қысқарту ең алдымен жасанды интеллект (ЖИ) жүйесін енгізумен байланысты. Енді мемлекеттік органдардағы бірқатар функцияларды автоматтандырылған жүйелер атқарады. ЖИ есеп-қисап пен құжат айналымын жүргізіп, талдау жұмыстарын орындайтын болады.

Ең көп қысқарту Салық комитетінде – 498 қызмет орны. Бұдан бөлек, Су шаруашылығы министрлігінде 224, Ауыл шаруашылығы министрлігінде 200, Әділет министрлігінде 197, Экология министрлігінде 176, ал Еңбек және кедейлікті қысқарту министрлігінде 163 орын қысқарады.

Қызметінен босатылған мемлекеттік қызметшілердің жұмысқа орналасуына Еңбек министрлігі мен Кәсіподақтар федерациясы қолдау көрсетеді.

Сонымен қатар, Өзбекстан билігі жасанды интеллект саласын дамытуға ауқымды инвестиция салып отыр. Елде 50 миллион доллар көлемінде қаржы бөлініп, суперкомпьютерлік кластер құрылуда. Денсаулық сақтау, білім, ауыл шаруашылығы, энергетика, көлік және қаржы салаларында 86 жоба іске қосылмақ.

2027 жылға дейін республикада 1 миллион жасанды интеллект маманын даярлау жоспарланған. Бұл бастама «Бір миллион ЖИ көшбасшысы» ұлттық бағдарламасы аясында жүзеге асады.