АҚШ Сенаты федералдық шығындарды қаржыландыруға қатысты бірде-бір заң жобасын қабылдай алмады. Соның салдарынан 1 қазаннан бастап мемлекеттік мекемелердің бір бөлігі жұмысын уақытша тоқтатты.

Дауыс беру барысында ұсынылған демократтар мен республикалықтардың жобалары жеткілікті қолдауға ие болмады. Нәтижесінде жүздеген мың мемлекеттік қызметкер ақысыз демалысқа жіберілді.

Ақ үй бұл жағдайға демократтарды кінәлап, республикалық бастаманы қолдаудан бас тартты деп айыптады. Ал демократтар өз кезегінде салықтық жеңілдіктерді сақтап қалу мен медициналық бағдарламаларды қаржыландыруды, соның ішінде Medicaid пен Ауруларды бақылау және алдын алу орталықтарын қорғап қалуды мақсат тұтқанын мәлімдеді.

Бұл – Дональд Трамп президент болғаннан бергі төртінші шатдаун. Соңғы рет үкімет жұмысы 2018 жылдың соңында тоқтаған еді. Қазіргі дағдарыстың ерекшелігі – Ақ үйдің бұл жағдайды федералдық қызметкерлердің санын қысқартуға пайдаланатынын ашық айтуы.

Қауіпсіздік пен әуе қозғалысын бақылау сияқты маңызды құрылымдар жұмысын жалғастырады. Дегенмен, экономикалық есептердің жариялануы, ұлттық саябақтардың жұмысы, федералдық көмек бағдарламалары мен бірқатар әлеуметтік төлемдер уақытша тоқтатылуы мүмкін.

Конгресс-бюджет басқармасының есебінше, 750 мың қызметкердің жұмысын тоқтатуы ел экономикасына күніне шамамен 400 млн доллар шығын әкелмек.