Қапшағай су қоймасы мен Іле өзенінің жағалауындағы белгілі кәсіпкерлер мен Тұңғыш президенттің туыстарының иелігіне өткен жер телімдері мемлекет меншігіне қайтарылды. Бұл туралы Ауыл шаруашылығы министрлігіне қарасты Жер ресурстарын басқару комитеті хабарлады.

Қыркүйек айының соңында Мәжіліс депутаты Бақытжан Базарбек су қорғау аймағындағы заңсыз жер бөлу фактілерін көтерген болатын. Оның айтуынша, ерекше қорғалатын аумақтарға жататын жерлер кезінде жеке адамдардың қолына заңсыз берілген. Сол тізімде Болат Назарбаев пен Құлыбаевтардың есімдері аталған.

Алматы облысының прокуратурасы мамыр айында Құлыбаевтар отбасына тиесілі жердің мемлекетке қайтарылғанын растады. Нақты көлемі көрсетілмегенімен, сол кезде тағы 9 гектар жағалаулық аумақ та мемлекет меншігіне өтті.

Белгілі болғандай, даулы жерлердің басым бөлігі 2000 жылдардың басында Қапшағай әкімдігінің шешімімен жеке тұлғаларға берілген. Ол кезде 1–5 гектар көлеміндегі учаскелер демалыс орындарын салу үшін бөлінген. Кейін олардың көбі қайта сатылған. Айта кетерлігі, Қапшағай су қоймасының су қорғау аймағы ресми түрде тек 2009 жылы ғана бекітілген.

Сонымен қатар, Қарасай ауданында да күмәнді жағдайлар тіркелген. Депутат Базарбектің айтуынша, ірі ауылшаруашылық жерлері қолдан жасалған құжаттар арқылы ұсақ телімдерге бөлінген. Әсіресе, Кемертоган ауылындағы 4,25 гектарлық жер теліміне байланысты жалған құжаттарды пайдалану дерегі бойынша Алматы облысының полиция департаменті тергеу жүргізіп жатыр.