Үкімет отырысында Премьер-министр Олжас Бектенов әлеуметтік сала мемлекет үшін басым бағыт болып қала беретінін атап өтті. Оның айтуынша, Мемлекет басшысының тапсырмасына сәйкес, барлық әлеуметтік міндеттемелер толық көлемде орындалады.

Сонымен қатар Үкімет басшысы жекеменшік білім беру және медициналық ұйымдарды субсидиялау тетіктерінде заңбұзушылықтардың бар екеніне назар аударды. Осыған байланысты Оқу-ағарту, Денсаулық сақтау және Қаржы министрліктеріне бір апта ішінде аталған бағыттағы саясатты қайта қарау бойынша нақты ұсыныстар әзірлеу тапсырылды.

Премьер-министрдің айтуынша, артық қаржыландыруды тоқтату қажет. Ол адал бәсекелестік талаптарына сай жұмыс істей алмайтын бизнеске мемлекеттік қолдау көрсету орынды емес екенін атап өтті. Бұл салада алаяқтық деректерінің кеңінен таралғаны да ерекше атап өтілді.

Бұдан бөлек, Еңбек және халықты әлеуметтік қорғау министрлігіне әкімдіктермен бірлесіп, жәрдемақылар мен әлеуметтік төлемдерді тағайындау кезінде алаяқтықтың алдын алуға бағытталған кешенді шаралар әзірлеу тапсырылды.