Тергеу мәліметінше, бір топ қыз танысу сайттары арқылы ер адамдармен танысып, кейін қарым-қатынасты жалғастыру үшін жалға алынған пәтерде кездесу ұсынған. Олар Астанада пәтерді жалға беру туралы жалған хабарландырулар орналастырып, тартымды интерьер фотоларын жариялаған. Осылайша жәбірленушілерге бірге уақыт өткізу үшін пәтерді бір тәулікке жалға алуды ұсынған.

Нәтижесінде 45-тен астам азамат жалған пәтерді жалға алу үшін жалпы шамамен 620 мың теңге көлемінде ақша аударған. Алайда қаражатты алғаннан кейін алаяқтар жәбірленушілермен байланысын үзіп, олардың телефон нөмірлерін бұғаттаған.

Сот үкімі бойынша айыпталушылардың кінәсін мойындауы және келтірілген материалдық залалды өтеуі ескеріліп, үш қызға 3 жылдан 3 жыл 6 айға дейінгі бас бостандығын шектеу жазасы тағайындалды. Сонымен қатар оларға пробациялық бақылау және мәжбүрлі еңбекке тарту жазасы қолданылды. Үкім заңды күшіне енді.

Қала прокуратурасы азаматтарды интернет арқылы келісім жасасқанда сақ болуға шақырып, ақпаратты алдын ала тексермей ақша аудармауға кеңес береді.

Айта кетейік, бұған дейін Семейде алаяқтар тұрғындарды 1 миллиард теңгеге сан соқтырған болатын.