TV+ деректеріне сәйкес, биылғы жылы ең көп қаралған ТОП-100 фильмнің 44-і қазақ тілінде, ал олардың жиынтық қаралым саны 416 мың бірегей көрерменге жеткен. Бұл - қазақ тіліндегі контентке деген қызығушылықтың артып келе жатқанын және аудиторияның ана тіліндегі сапалы өнімге нақты сұранысы бар екенін дәлелдейді.

Мемлекет креативті индустрияны дамытуда қазақ тіліндегі дубляж өндірісін өрістетуге басымдық беріп келеді. Себебі көркем фильмдер мен мультфильмдердің, телесериалдар мен анимациялық жобалардың қазақша сөйлеуі тілдік ортаны кеңейтіп қана қоймай, ұлттық құндылықтарды заманауи форматта жеткізудің тиімді құралы саналады.

Осы бағытта TV+ жобасы аясында ауқымды жұмыстар атқарылуда. Бүгінде платформада қазақ тілінде дубляждалған фильмдер мен мультфильмдердің саны ай сайын артып келеді. Әсіресе, Walt Disney студиясының танымал фильмдері мен анимациялық картиналары алғаш рет қазақ тіліне дубляждалып, көрерменге қосымша ақысыз ұсынылуы - еліміздегі дубляж саласының жаңа белесі.

Қазіргі таңда TV+ кітапханасында Disney-дің 60 фильмі қазақ тілінде қолжетімді болса, жыл соңына дейін бұл көрсеткішті 87-ге дейін арттыру жоспарланып отыр.

TV+ ұсынған деректер мен көрермен белсенділігі көрсетіп отырғандай, қазақ тіліндегі сапалы контент – уақыт талабы ғана емес, қоғамның саналы таңдауы.