Оқиға 12 наурыз күні кешкі уақытта болған. Дүкенде кассада тұрған Алмасбек Әліпбайтегіге екі жігіт келіп, темекі алмақ болады. Алайда олар ұсынған 500 теңге купюра жарамсыз болғандықтан, сатушы ақшаны қабылдаудан бас тартқан. Осыдан кейін сөзге келіспеушілік туындап, келгендер “ағаларымызды шақырамыз” деп қоқан-лоқы көрсеткен.

Арада көп уақыт өтпей, дүкенге бірнеше адам қайта кіріп, сатушыға жабылған. Жәбірленушінің айтуынша, олар есікті жауып алып, қолын қайырып, еден жуатын таяқпен басы мен желкесінен есінен танғанша ұрған. Көмекке келген мектепте оқитын інісі де соққыға жығылған. Соның салдарынан оның тістері босап, миы шайқалып, қабырғасы зақымданған.

Жәбірленушілер полицияға арыз беру оңай болмағанын айтады. Олардың сөзінше, құқық қорғау органдары бірден әрекет етпей, тек бірнеше күннен кейін ғана хабарласқан. Тіпті бастапқыда Алмасбекке күдікті ретінде қаралғанын алға тартады.

Кейін әлеуметтік желіде жарияланған жазбалардан соң іс қозғалып, күдіктілер анықталған. Түркістан облысы полиция департаментінің мәліметінше, оқиғаға қатысы бар адамдар ұсталып, “бұзақылық” бабы бойынша сотқа дейінгі тергеу басталған. Қазіргі таңда екі күдікті уақытша ұстау изоляторына қамалған.

Дегенмен жәбірленушілер барлық қатысушылар толық жауапқа тартылмағанын айтып, істі тек бұзақылық емес, тонау және денсаулыққа зиян келтіру баптарымен де қарауды талап етіп отыр.