Танымал боксшы Данияр Елеусіновтың әйелінің үстінен шағым түсті, – деп хабарлайды «Dalamedia» ақпараттық порталы 31-арнаның «Информбюро» жаңалықтар қызметіне сілтеме жасап.

Қарағандылық екі әйел спортшының жұбайы «бізге күш қолданды» деп шағымданған. Полиция өкілдері істің мән-жайын анықтап жатыр.

Қолда бар деректерге сүйенсек, оқиға Қарағанды қаласындағы Майқұдық ауданында болған. Жағдайға қатысы бар Әсел Жабықбаеваның айтуынша, кешкі уақытта үйіне бейтаныс әйел келіп есікті қағып, айқайлаған. Есікті ашқан сәтте ол өзін көршінің немересі ретінде таныстырған. Содан кейін арада түсініспеушілік туындап, келіншек үй иесіне және оның анасына қол көтерген.

Оқиғадан соң 60 жастағы әйел медициналық көмекке жүгінген. Дәрігерлер оның саусақ сіңірі жыртылғанын, жеңіл ми шайқалуы мен ерін ісінуі бар екенін анықтаған. Ал Әселдің жұмсақ тіндері зақымданған.

Өз кезегінде боксшының жұбайы бұл айыптауларды жоққа шығарады. Оның айтуынша, ол жанжал кезінде тек 81 жастағы атасын қорғауға тырысқан және ешкімге қол көтермеген.

Қарағанды облыстық Полиция департаментінің ресми өкілі Бақытжан Құдияров барлық тараптың арызы тіркеліп, бірнеше қылмыстық іс бойынша сотқа дейінгі тергеу басталғанын мәлімдеді. Қазір зардап шеккендердің денсаулығына келген зиянның деңгейін анықтау үшін сот-медициналық сараптама тағайындалған. Полиция оқиғаның барлық мән-жайын жан-жақты тексеріп жатыр.