Былтыр Ақтауда 6 жасар қызды қағып кеткен 20 жасар жүргізуші әлі бостандықта жүр, – деп хабарлайды «Dalamedia» ақпараттық порталы «31 арнаның» «Информбюро» жаңалықтар қызметіне сілтеме жасап.

Жол апатына тап болған жеткіншектің есімі – Ләйлә. Оқиға салдарынан оның сүйектері сынып, бірнеше ай төсекке таңылған. Атап айтқанда, қыздың екі саны мен алақан сүйектері, жағы мен иегі, қабырғалары сынған. Өкпесіне де зақым келген. Ауыр жарақат алып, екі ай бойы төсекке таңылған. Тек үш айдан кейін ғана аяққа тұра бастаған, бірақ әлі мектепке бара алмайды. Бүгінде ол үй жағдайында білім алуда. Дәрігерлер қызға 10 жасқа дейін мүгедектік рәсімдеуді ұсынған.

Ата-анасы тергеудің әділ жүріп жатқанына күмән білдіруде. Анасының сөзінше, газ бен тежегішті шатастырған жігіт қызды екі рет басып өткен. Жол апаты бейнебақылау камерасына түсіп қалған. Видеодан оқиға орнында тұрған балалар көрінеді, ал жүргізуші қызды жедел жәрдем шақырмай, өз көлігіне салып алып кеткен. Соның салдарынан Ләйләға уақытында көмек көрсетілмей, жағдайы ауырлаған.

Тәттігүл Смағұл тергеудің созбалаңға салынғанын айтып, күдіктінің бостандықта болуына наразы. Полиция департаменті іс қозғалғанын хабарлап, тергеу амалдарының жалғасып жатқанын жеткізді. Ләйлә әлі аяққа толық тұра алмайды. Кішкентай қызға тағы бір күрделі ота жасалуы қажет.