Түркістан облысында орталық алаңға орнатылған жаңажылдық бас шыршаны қағып кеткен жүргізуші жауапкершілікке тартылды.

Оқиға түнгі сағат 03:00 шамасында болған. Сарыағаш аудандық полиция басқармасына белгісіз автокөліктің мерекелік шыршаны соғып, оқиға орнынан кетіп қалғаны туралы хабарлама түскен.

Аталған дерек бойынша полиция қызметкерлері алаң аумағындағы жедел басқару орталығының бейнебақылау камераларындағы жазбаларды тексерді. Нәтижесінде жол-көлік оқиғасын жасаған жүргізушінің жеке басы анықталды.

Белгілі болғандай, ВАЗ-2105 автокөлігін басқарған жас жүргізуші шыршаны айналып өтпек болып, рөлге ие бола алмай, соқтығысқан. Оқиғадан кейін ол келтірілген шығынды өтеп, зақымдалған шыршаны қалпына келтірген.

Жүргізушіге қатысты қолданыстағы заңнамаға сәйкес әкімшілік шаралар қолданылып, автокөлік айыптұрағына қойылды.