Сәбиін дүниеге әкелген бойда көз жұмды. Жамбылдық Салтанат Нышанбай жансақтау бөлімінде жан тапсырған, – деп хабарлайды «DalaMedia» ақпараттық порталы «31 арнаның» «Информбюро» жаңалықтар қызметіне сілтеп.

Марқұмның туыстарының сөзінше, келіншек емханаға бірнеше рет барып, қарала алмаған. Медициналық мекеме қызметкерлері: «Сен жеке кәсіпкерсің», – деп айтыпты. «40 мың төлемегенсің» деген қолхат алыпты. Алайда заң бойынша жүкті әйелдер мен тәуекел тобына жататын азаматтар МӘМС жүйесіне қарамастан медициналық көмек алуы тиіс болған. Осылайша Салтанаттың жақындары дәрігерлердің салғырттығына шағымдануда.

Емханаға тіркеле алмаған келіншек туыстарына аяқтарының ісіп, денсаулығының нашарлағанын хабарлаған. Тек телефон арқылы акушерден кеңес алып отырған.

Дәрігерлер келіншекті кесарь тілігі арқылы босандырған. Бір аптадан соң ол ес-түссіз қалып, комаға түскен. Бір айдан кейін Салтанат қайтыс болды.

Марқұмның анасы перзентхана дәрігерлері де тиісті бақылау жасамады деп есептейді. Оның айтуынша, қызы жоғары қан қысымымен түскен, алайда бастапқыда сепсис болмаған. Туыстарының болжамынша, операциядан кейінгі асқынулар салдарынан жағдайы күрт нашарлаған.

Ал облыстық перинаталдық орталық өкілдері қазіргі уақытта қызметтік тексеріс жүріп жатқанын хабарлады. Мекеме басшылығы қорытынды шыққаннан кейін ғана нақты шешім қабылданатынын мәлімдеді.

Айта кетейік, Салтанат Нышанбай бірнеше шет тілін меңгерген, шетелде білім алған. Оның артында бес жасар қызы мен бір айлық сәбиі қалды.