Ата-аналар балалар ауруханасындағы тамақ сапасына күмәнмен қарайды. Қарағандыдағы облыстық емханада дау шықты,-деп хабарлайды «Dalamedia» ақпараттық порталы, Tengrinews.kz сайтына сілтеме жасап.

Емделуші Гүлбахыт Күлмаханова үш жасар баласымен ем алады. Келіншектің айтуынша, тамақты алған кезде ыдыстан бір нәрсе қозғалғанын байқаған. «Бір нәрсе қозғалды ма деп қорқып кеттім. Палатадағы көршілерім де шошыды, кейбірінің құсқысы келді. Кейін күріш арасында тарақан барын білдік. Науқастар жаппай тамақтан бас тарттық», – деді теміртаулық азамат.

Осыған ұқсас бірнеше жағдай тіркелген, ата-аналар жағдайды фото мен видеоға түсіріп, мамандарға жіберген. Аурухана қызметкерлері тамақты ауыстырамыз деп уәде бергенімен, жеткізуші компания өкілдері тексеріс жүргізіп, қауіпсіз деп таныған. Дегенмен ата-аналардың наразылығынан кейін жауаптылар кешірім сұраған.

Мекеме өкілдері тамақ сапасы біздің бақылауда болады дейді:

«Науқастардың тамақ сапасы мен қауіпсіздігі – біздің басты басымдықтарымыздың бірі», – дейді «ОҚБ» КМК емдеу жұмысы жөніндегі орынбасары Люция Гомель.

Аурухана әкімшілігі тиісті шаралар қабылданғанын, материалдар тиісті органдарға жолданғанын айтады. Ата-аналар жағдайдың бақылауда болуын сұрайды. Қарағанды облыстық полиция департаменті оқиғаға кейінірек түсініктеме беретінін хабарлады.