Қостанай облысында тойдан кейін жаппай улану фактісі тіркелген кафе қызметінде көптеген санитарлық талаптардың бұзылғаны анықталды. Бұл туралы облыстық санитарлық-эпидемиологиялық бақылау департаменті хабарлады.
22 қазанда Арқалықтағы тойдан кейін 86 адам медициналық көмекке жүгінген, олардың 83-і ауруханаға жатқызылған. Айта кетерлігі, зардап шеккендердің 16-сы шараға қатыспаған, бірақ сарқыт жегеннен кейін уланған.
Департамент басшысының орынбасары Гүлім Досумова мәлімдегендей, эпидемиологиялық тергеу барысында бірқатар өрескел заңбұзушылықтар анықталған:
«Нысанды тексеру кезінде санитарлық ережелердің сақталмағаны белгілі болды. Алынған 40 сынаманың 7-інде ішек таяқшалары тобының бактериялары анықталды. 11 қызметкердің екеуінен Salmonella Enteritidis табылды - бұл науқастардан анықталған қоздырғышпен бірдей», -деді ол.
Мамандардың айтуынша, сальмонеллез анықталған екі қызметкер - дені сау тасымалдаушылар, яғни өздері ауырмаса да, инфекцияны жұқтыру көзі болуы мүмкін. Бұл қоғамдық тамақтану нысандары үшін ең қауіпті жағдайлардың бірі.
Сонымен қатар, кафе қызметкерлерінің басым бөлігінде санитарлық кітапша болмаған, ал барларының мерзімі өтіп кеткені анықталған. Қазіргі таңда нысан барлық бұзушылықтар жойылғанға дейін жабық.
Полиция қызметкерлері аталған дерек бойынша «Санитарлық ережелер мен гигиеналық нормативтерді бұзу» бабымен тергеу жүргізіп жатыр.
Барлық зардап шеккендердің ішінде бір адам ғана ауруханада емін жалғастыруда, қалғандары сауығып, үйлеріне шығарылған.
Еске сала кетейік, Арқалықтағы тойдан кейін 80-нен астам адам улану белгілерімен ауруханаға түскен, олардың қатарында жеті бала бар. Кафенің қызметі сол кезде-ақ тоқтатылған болатын.
DALAMEDIA admin
8
0