Бас прокурордың орынбасары Ғалымжан Қойгелдиев Атырауда өткен тойда сыбайлас жемқорлық үшін сотталған Бақытгүл Хаменованың бой көрсетуі заң аясында болғанын мәлімдеді.

Оның айтуынша, Хаменоваға жаза өтеуді үш жылға кейінге қалдыру туралы шешім қабылданғандықтан, мұндай жағдайда іс-шараларға қатысуға тыйым салынбайды.

Бұған дейін ІІМ Қылмыстық-атқару жүйесі комитеті де видеоға қатысты түсініктеме берген болатын. Ведомство мәліметінше, Хаменова пробация қызметінің бақылауында.

Еске салайық, 2022 жылдың 15 қарашасында Атырау қалалық соты облыс әкімінің бұрынғы орынбасары Бақытгүл Хаменованы кінәлі деп танып, жеті жылға бас бостандығынан айыру жазасын тағайындаған. Алайда сот баласының кішкентай болуына байланысты жазаны өтеуді кейінге қалдырды. Осыған байланысты Хаменова сот залынан босатылған еді.

2023 жылдың ақпанында апелляциялық инстанция алғашқы сот шешімін өзгеріссіз қалдырды.