Соңғы күндері әлеуметтік желілерде елорда тұрғындары арасында «жаңа вирус» жайлы шағымдар жиілеп кетті. Көпшілік ұзаққа созылған жоғары температура, жөтел мен әлсіздік сияқты белгілердің байқалып жатқанын жазуда. Кейбір ата-аналар балалардың қызуы 5–7 күнге дейін түспей жатқанын, ал ауруханалар мен емханаларда орын тапшы екенін айтып дабыл қаққан.

Осыған байланысты жағдайға түсініктеме берген Астана қаласы санитарлық-эпидемиологиялық бақылау департаменті жұқпалы аурулар көрсеткіші өткен жылмен шамалас деңгейде екенін хабарлады.

Департамент басшысының орынбасары Жанна Пралиева мәліметінше, биылғы эпидемиологиялық маусым 2 қазаннан бастап есептеліп, осы уақытқа дейін елордада 27 469 ОРВИ дерегі тіркелген. Бұл 100 мың тұрғынға шаққанда 1 796,8 жағдайды құрайды - өткен жылдың сәйкес кезеңімен салыстырғанда 5 пайызға төмен.

Ауру жұқтырғандардың басым бөлігі - 14 жасқа дейінгі балалар (61%), олардың ішінде 920-сы бір жасқа толмаған сәбилер. Маусым басталғалы бері 982 науқас ауруханаға жатқызылған, оның ішінде 76 жүкті әйел және 356 нәресте бар.

Сонымен қатар, 23 қыркүйектен бастап елордада маусымдық тұмауға қарсы вакцинация жүргізілуде. Биыл 145 мың доза «Гриппол+» вакцинасы сатып алынған. 30 қазанға дейін 134 977 адам егілген, бұл - халықтың шамамен 8,8 пайызы. Қауіп тобына жататын азаматтардың 98 пайызы вакцина алған.

Департамент мамандары тұрғындарға алғашқы белгілер байқалғанда өз бетімен емделмей, дәрігерге жүгінуге, сондай-ақ қоғамдық орындарда маска тағуға және ауру балаларды мектеп пен балабақшаға жібермеуге кеңес берді.