Алматыда 2024 жылғы қаңтар айында болған жер сілкінісі кезінде автоматтандырылған ескерту жүйесінің істен шығуына байланысты үш шенеунік сотталды. Бұл туралы 2025 жылғы 3 қарашада қалалық прокуратура хабарлады.
Еске сала кетсек, 2024 жылғы 23 қаңтарда Алматыда күші 5 балдық жер сілкінісі тіркелген еді. Алайда алдын ала ескертуге арналған қымбат автоматтандырылған жүйе іске қосылмаған. Прокуратураның тексерісі барысында сатып алынған жабдықтың сапасыз болғаны және оны қабылдау кезінде бірқатар өрескел заңбұзушылықтарға жол берілгені анықталды.
Тергеу қорытындысына сәйкес, «TNS-INTEC» ЖШС-ның бас директоры пайдакүнемдік мақсатта сапасыз құрылғы жеткізіп, атқарылған жұмыстар туралы жалған актілер рәсімдеген. Нәтижесінде бюджет қаржысын аса ірі көлемде жымқырған.
Бұл іс бойынша Алматы гарнизонының әскери соты үкім шығарды. Қалалық Төтенше жағдайлар департаменті басшысының үш орынбасары мен техникалық және авторлық қадағалау өкілдері өз міндеттерін тиісті деңгейде орындамағаны үшін кінәлі деп танылды. Олар мемлекеттік және квазимемлекеттік қызметтерде жұмыс істеу құқығынан айырылып, бас бостандығынан айыру жазасына кесілді.
Айта кетерлігі, сол жылғы қаңтардағы жер сілкінісі кезінде 67 алматылық медициналық көмекке жүгінген. Бірнеше тұрғын дүрбелең кезінде терезеден секіріп жарақат алған. Дүмпулер бірнеше сағатқа созылған болатын.
DALAMEDIA admin
6
0