Камчатка жағалауында қуатты жер сілкінісі тіркелді. Жерасты дүмпулері шамамен 10 шақырым тереңдікте, Петропавл-Камчатский қаласынан 100 шақырым жерде болған.

Әртүрлі деректерге сәйкес, магнитудасы 7,2 мен 7,8 аралығында. АҚШ Геологиялық қызметі алғашқыда сілкініс күшін 7,8 деп бағаласа, Ресей Ғылым академиясының Геофизикалық қызметі 7,4 деп хабарлады. Ал өңір губернаторы Владимир Солодов нақтылағандай, магнитудасы 7,2 болған.

Алғашқы күшті дүмпуден кейін магнитудасы 5,8-ге дейін жеткен афтершоктар тіркелді. Өңірде цунами қаупі жарияланып, кейін ескерту алынып тасталды.

Губернатордың айтуынша, барлық қызметтер жоғары дайындық режиміне көшірілді, әлеуметтік нысандар мен ғимараттар тексерілуде. Әзірге қаза тапқандар мен қирандылар туралы ақпарат жоқ.

Еске салсақ, 30 шілдеде Камчаткада магнитудасы 8,8-ге жеткен жер сілкінісі болған еді. Бұл – соңғы 14 жылдағы әлемдегі ең күшті дүмпу.