Еуропалық комиссия TikTok платформасы Еуроодақтың Цифрлық қызметтер туралы заңын (DSA) алдын ала бұзуы мүмкін деген қорытынды жасады. Бұл туралы Euronews жазды, - деп хабарлайды “Dalamedia” ақпараттық порталы.

Реттеуші органның мәлімдеуінше, қосымшада пайдаланушыларда тәуелділік қалыптастыру қаупі бар функцияларды шектеу жеткіліксіз.

Комиссияның бағалауына сәйкес, TikTok-та шексіз айналдыру (infinite scroll) сияқты дизайн элементтері қолданылады. Бұл механизмдер экранды әр жаңартқан сайын жаңа контент ұсынып, қолданушыларды қосымшаны ұзақ әрі жиі пайдалануға итермелеуі ықтимал.

Реттеушілер мұндай функциялар адамның назарын автоматты түрде ұстап тұрып, контентті ойланбастан тұтынуға бейімдейді деп есептейді. Әсіресе, балалар мен жасөспірімдер үшін бұл жағдай алаңдауға тұралық фактор саналады.

Еурокомиссия TikTok-тың тәуелділік тудыруы мүмкін ерекшеліктерден пайдаланушыларды қорғау үшін жеткілікті шаралар қабылдамағанын атап өтті. Комиссияның технологиялық егемендік, қауіпсіздік және демократия мәселелері жөніндегі атқарушы вице-төрағасы Хенна Вирккуненнің айтуынша, әлеуметтік желілерге тәуелділік жасөспірімдердің дамып келе жатқан психикасына кері әсер етуі мүмкін. Ол DSA заңы платформаларды өз қызметінің салдары үшін жауапкершілікке міндеттейтінін айтты.

Сондай-ақ комиссия 13–17 жас аралығындағы қолданушыларға арналған «Күнделікті экран уақыты» функциясының тиімділігіне күмән келтірді. Бір сағаттық лимит автоматты түрде қойылғанымен, ескертулерді оңай айналып өтуге болатыны айтылды.

Ата-аналарға арналған «Отбасылық жұп» (Family Pairing) бақылау жүйесі де назардан тыс қалмады. Комиссия бұл құралдар ата-аналардан қосымша уақыт пен цифрлық сауат талап ететіндіктен, оның тиімділігі төмен болуы мүмкін деп санайды.

Реттеушілер ұсынған ықтимал өзгерістер қатарында шексіз айналдыруды алып тастау, контент қарау кезінде үзілістер енгізу және ұсыным алгоритмдерін қайта қарау бар.

TikTok компаниясы Еурокомиссияның алдын ала қорытындыларымен келіспейтінін мәлімдеді. Компания өкілдері бұл бағалау платформаның жұмысы туралы бұрмаланған түсінік қалыптастырады деп есептейтінін айтып, шешімге қарсы шағымданатынын жеткізді. TikTok экран уақытын бақылаудың әмбебап тәсілі жоқ екенін алға тартып, пайдаланушыларға демалыс ескертулері, түнгі режим және уақытты басқару құралдары ұсынылатынын хабарлады.

Айта кетейік, Еурокомиссияның TikTok-қа қатысты тергеуі 2024 жылы басталған. Қорытындылар алдын ала сипатта болғандықтан, әзірге санкция қолданылған жоқ. Егер заң бұзушылық түпкілікті дәлелденсе, компанияға жылдық жаһандық айналымының 6 пайызына дейін айыппұл салынуы мүмкін.