Алматы қаласының әкімдігі жеке меншіктегі «Қайрат» футбол клубына бюджеттен 750 млн теңге бөлінуі мүмкін деген ақпаратқа түсініктеме берді. Әкімдік бұл қаражат клубтың негізгі командасын қаржыландыруға арналмағанын, балалар мен жасөспірімдер футболын ұйымдастыру үшін қарастырылғанын айтты, - деп хабарлайды «Dalamedia» ақпараттық порталы BES.media сайтына сілтеп.

Қалалық әкімдіктің мәліметінше, бұл ақша әртүрлі жас санатындағы балалар мен жасөспірімдер командаларын дайындау және олардың Қазақстан чемпионаттарына қатысуын қамтамасыз етуге бағытталмақ. Қызмет көрсететін ұйым арнайы конкурс арқылы анықталады. «Қайрат» бұл конкурста жеңіске жетуі де, жетпеуі де мүмкін.

Әкімдік өкілдері «Қайраттың» ықтимал орындаушылар қатарында аталуын клубта балаларға арналған инфрақұрылымның барымен, лицензияланған футбол академиясы мен тәжірибелі жаттықтырушылардың жұмыс істеуіне байланысты деп түсіндірді. Сонымен бірге футболмен айналысатын балалар санының көптігі де ескерілген екен.

Билік өкілдері бұл қаржы негізгі құрамдағы кәсіби футболшылардың жалақысына, шетелдік жарыстарға қатысуға немесе клубтың коммерциялық мақсаттарына жұмсалмайтынын нақты атап өтті.

Алайда BES.media жариялаған құжаттарда 2026 жылға арналған бюджеттік өтінімде 750 млн теңге нақты «Қайрат» клубына деп көрсетілген. Онда клубтың штат саны, жаттықтырушылар мен тәрбиеленушілер туралы мәліметтер де бар.

Айта кетейік, бұған дейін де «Қайрат» осындай қаржыландыру алған. 2025 жылы балалар мен жасөспірімдер командаларын ұйымдастыруға арналған конкурсқа клуб жалғыз қатысып, бөлінген қаржы көлемі 750 млн теңгені құраған.