Шымкент қаласында 12 жеке сот орындаушы мемлекеттік лицензиясынан айырылды. Бұл туралы қалалық прокуратура хабарлады.

Тексеру барысында сот орындаушыларының борышкерлерге қойылған елден шығу шектеулерін заңсыз алып тастағаны және атқарушылық іс жүргізулерді заңсыз қозғағаны анықталды. Кейбір істер сот орындаушылары демалыста болған кезде олардың көмекшілері тарапынан рәсімделген.

Анықталған заңбұзушылықтарға байланысты 85 жеке сот орындаушысы тәртіптік жауапкершілікке тартылды. Әділет министрлігінің талап-арызын сот қанағаттандырып, 12 сот орындаушысының лицензиясы кері қайтарылды. Сот шешімі заңды күшіне енді.