Қазақстан Республикасы Ұлттық Банкі «Цифрлық теңгені шығару, айналысқа жіберу және өтеу қағидаларын бекіту туралы» жаңа қаулы жобасын жария талқылауға шығарды. Құжат 2026 жылғы 4 ақпанда әзірленген және талқылау 19 ақпанға дейін жалғасады,-деп хабарлайды «Dalamedia» ақпараттық порталы.

Жоба Қазақстанның қаржы нарығын дамыту, цифрлық төлем жүйелерін жетілдіру және смарт-келісімшарттарды енгізу мақсатында қабылдануы жоспарланған заңдарға сәйкес әзірленді. Қаулы цифрлық шоттарды ашу, жүргізу және жабу тәртібін, цифрлық теңгені таңбалау рәсімдерін, сондай-ақ қатысушылардың цифрлық теңге платформасындағы өзара іс-қимыл ережелерін қамтиды.

Ұлттық Банктің мәліметінше, жоба қабылданған жағдайда цифрлық теңгені айналысқа енгізу үшін құқықтық жағдайлар бекітіліп, қаржы нарығына қатысушылар, азаматтар мен бизнес үшін цифрлық шоттарды жүргізу тәртібі айқындалатын болады. Құжат әлеуметтік-экономикалық немесе құқықтық жағынан теріс салдарға жол бермейді деп көрсетілген.

Аталмыш құжаттар «АшықНҚА» -ның сайтына жарияланды.

Қоғамдық талқылауға кез келген азамат пікір қалдырып, ұсыныс бере алады.