«Ұлттық қор – балаларға» бағдарламасы аясында жиналған қаржыны қадағалау бүгінде бірнеше цифрлық платформа арқылы қолжетімді. БЖЗҚ мәліметінше, қаражатты тексеру тәртібі қатысушының жасына байланысты өзгереді.

Кәмелетке толмаған балалардың жинағын қалай көруге болады?

18 жасқа толмаған балалардың бағдарламаға қатысуы және олардың шотындағы қаражат көлемін ата-анасы немесе заңды өкілдері баланың жеке сәйкестендіру нөмірі (ЖСН) арқылы тексере алады. Ол үшін келесі платформаларды пайдалануға болады:

• БЖЗҚ-ның арнайы kids.enpf.kz сайты;

• eGov mobile мобильді қосымшасы;

• кейбір екінші деңгейлі банктердің мобильді сервистері.

18 жасқа толған қатысушылар қайдан тексере алады?

Кәмелет жасына жеткен азаматтар өз жинақтарын өз бетінше келесі арналар арқылы көре алады:

• enpf.kz сайтындағы жеке кабинет арқылы;

• Бірыңғай жинақтаушы зейнетақы қорының мобильді қосымшасында;

• eGov mobile мобильді қосымшасында.

Жиналған қаражатты пайдалану тәртібі қандай?

Жинақталған қаражатты пайдалану туралы шешім қабылданған жағдайда, ең алдымен АҚШ долларымен банктік шот ашу қажет. Осыдан кейін тиісті мақсатқа жұмсау үшін онлайн өтініш жолданады.

Өтініштер уәкілетті банктердің интернет-ресурстары немесе мобильді қосымшалары арқылы қабылданады:

• «Отбасы банкі» АҚ — тұрғын үй жағдайын жақсарту және білім беру шығындарын өтеу үшін;

• «Қазақстан Халық банкі» АҚ — білім беру ақысын төлеу мақсатында;

• «Банк ЦентрКредит» АҚ — білім беру қызметтеріне ақы төлеу үшін.

Айта кетейік, «Ұлттық қор – балаларға» бағдарламасы балалардың болашағына инвестиция құруды көздейтін, білім алуына және тұрғын үй мәселесін шешуге мүмкіндік беретін ұзақмерзімді мемлекеттік жоба болып табылады.