Индустрия және құрылыс министрлігі Бірыңғай жинақтаушы зейнетақы қорындағы (БЖЗҚ) қаражатты пайдалану тетіктерін кеңейтуді көздейтін бұйрық жобасын әзірледі. Құжат 21 қарашаға дейін «Ашық НҚА» порталында көпшілік талқылауына ұсынылған.

Жобаға сәйкес, қазақстандықтарға зейнетақы жинақтарын төмендегі мақсаттарға пайдалану мүмкіндігі берілмек:

• ипотекалық тұрғын үй несиесінің негізгі қарызын өтеу;

• ай сайынғы төлем мөлшерін азайту;

• несиенің мерзімін қысқарту.

Бұл өзгерістер Салық кодексінің жаңа редакциясымен тікелей байланысты. Енді Қазақстан резиденттері БЖЗҚ-дан төленетін зейнетақы төлемдерінен жеке табыс салығын төлеуден босатылады.

Министрлік өкілдерінің айтуынша, бастаманың басты мақсаты — біржолғы зейнетақы төлемдерін пайдалануды барынша тиімді әрі ыңғайлы ету, сондай-ақ азаматтарға тұрғын үй жағдайын жақсарту үшін қосымша мүмкіндік беру.