«Ұлттық ақпараттық технологиялар» АҚ pki.gov.kz порталындағы жеке кабинет арқылы электрондық цифрлық қолтаңба кілттерін қайта шығару кезінде қосымша тексеру кезеңі енгізілгенін хабарлады.

Енді ЭЦП-ны қайта рәсімдеу барысында пайдаланушылар екі тәсілдің бірі арқылы қосымша растаудан өтеді. Бірінші жағдайда телефон нөміріне бір реттік SMS-код жіберіледі. Екінші тәсіл - eGov Mobile қосымшасындағы цифрлық құжатта көрсетілген кодты енгізу.

Компания өкілдерінің мәлімдеуінше, бұл талап Қазақстан азаматтарына қатысты қолданылады. Ал бейрезиденттерге бұл механизм енгізілмейді, себебі олардың телефон нөмірлері мобильді азаматтар базасында тіркелмеген.

Қабылданған өзгерістер электрондық цифрлық қолтаңбаны заңсыз пайдаланудың алдын алуға және кілттерді қайта шығару үрдісінің қауіпсіздігін арттыруға бағытталған.