Шымкентте жол апатына түскен 31 жастағы ер адам 35 күн комада жатып, есін жиды, — деп хабарлайды «Dalamedia» ақпараттық порталы.

Қалалық денсаулық сақтау басқармасының мәліметінше, науқас мотоциклмен жол апатына түскен. Ол өте ауыр жарақат алған. Дәрігерлер азаматтың өмірін сақтап қалу үшін бір айдан астам уақыт бойы үздіксіз күрескен.

Мамандар науқасқа бірнеше күрделі операция жасаған. Ауыр халде жатқан азамат ақыры есін жиып, қазіргі кезде өздігінен тамақтана бастаған.

Дәрігерлер оған ауыр жарақат, жабық және ашық бас-ми жарақаты, сондай-ақ миының қатты соғылуы диагноздарын қойған. Бұдан бөлек, кеуде тұсының жабық жарақаты, сол жақтағы бірінші, екінші және үшінші қабырғалардың сынуы, сол жақ бұғана сүйегінің көпжақты сынуы, өкпенің соғылуы мен ми ісінуі анықталған.

Мамандардың айтуынша, науқастың бас сүйегіне трепанация жасалып, сол жақ төбе тұсында пайда болған жедел эпидуралды гематома алыныпты. Қазір оның жағдайы дәрігерлердің бақылауында.