Жамбыл облысында әлеуметтік желі қолданушыларының ашу-ызасын тудырған жағдай тағы да күн тәртібіне шықты. Бұған дейін 17 жыл бойы ағаларының құлдығында болған Құндыз бен Назгүлдің енді қазіргі қамқоршылары тарапынан да зорлық-зомбылық көріп жүргені туралы күдік күшейді. Әлеуметтік желіде Құндыздың қол-аяғы байланған суреті тарады.

Оқиғаның мән-жайын анықтау үшін тілшілер апалы-сіңлілер тұрып жатқан үйге барды. Алайда барған сәтте Құндыз бен Назгүлді жедел жәрдем қызметі алып кеткені белгілі болды. Біраз уақыттан кейін қайта оралғанымен, үйге кіріп, сұхбат алу мүмкін болмады.

Қыздардың асыраушысы Зүлфия ханым сұхбат беруден бас тартты. Оның айтуынша, денсаулығы күрт нашарлаған.

Дегенмен, бұл жағдай құқық қорғау органдарының назарынан тыс қалмады. Құндыздың «Мені Зүлфия мама байлап тастады» деген мәлімдемесінен кейін, қамқоршысының атына қылмыстық іс қозғалды. Қазіргі таңда тергеу амалдары жүргізіліп жатыр.

Құқық қорғау органдарының мәліметінше, Құндыз бен Назгүл уақытша №5 арнаулы әлеуметтік қызметтер көрсету орталығына орналастырылған. Онда қыздар үшін барлық қажетті жағдай жасалған.

Сонымен қатар, белгілі журналист Руслан Өтепбай апалы-сіңлілерді қамқорлығына алуға ниет білдіріп, тиісті құжаттарды жинауды бастап кеткен. Ал әзірге Құндыз бен Назгүл екі апта бойы дәрігерлердің бақылауында болады.

Оқиға қоғамда үлкен резонанс тудырып, жетім балалардың қауіпсіздігі мен қамқорлық мәселесін қайтадан алдыңғы қатарға шығарды.