Алматылық ана жеті айлық қызын омыраудан шығару үшін үш күнге күтушіге қалдырған. Алайда арада бірнеше сағат өткен соң сәбиінің қайтыс болғаны туралы суық хабар алған, — деп хабарлайды «Dalamedia» ақпараттық порталы.

Гүлайым Серікбол – алты баланың анасы. Кенже қызынан айырылғанына сегіз айдан астам уақыт өтсе де, ана жүрегіне түскен қайғы басылмағанын айтады.

Баласын уақытша күтушіге қалдырған әйел көп ұзамай қайғылы хабар естіген. Оның сөзінше, таңғы сағат төрт шамасында оған «қызыңыз дем алмай жатыр» деген хабар келген.

Анасы оқиға орнына жеткенде сәбиінің бөлмеде жатқанын көрген. Оның айтуынша, баланың беті жабулы болған. Дәрігерлер нәрестенің біраз уақыт бұрын қайтыс болғанын айтқан.

Гүлайым Серікболдың айтуынша, сараптама қорытындысында баланың өліміне байланысты тұншығу белгілері көрсетілген. Ал күдікті ретінде ұсталған күтуші өз кінәсін мойындамай отыр.

Қазір аталған іс сотта қаралуда. Айыпталушы тарап сәбидің өліміне қатысы жоқ екенін айтып, ақталуға тырысуда. Оның қорғаушысы баланың денсаулығы мен медициналық бақылауына қатысты мәселелер болғанын алға тартқан.

Заңгерлер мұндай жағдайлардың алдын алу үшін ата-аналар бала күтушіні таңдағанда мұқият болуы керектігін ескертеді. Мамандар күтушінің бұрын сотталған-сотталмағанын, арнайы есепте тұрған-тұрмағанын, тәжірибесін және мінездемесін алдын ала тексеру маңызды екенін айтады.

Жеті айдан бері қаралып жатқан іс бойынша соңғы шешімді сот шығарады. Егер күдіктінің кінәсі толық дәлелденсе, оған заң бойынша ең қатаң жаза тағайындалуы мүмкін.