Батыс Қазақстан облысының тұрғыны Наталья Қалымбетова отыз жылдан астам уақыт ішінде ішіне бүккен ауыр сырын ақтарды. 17 жасында топтық зорлықтың құрбаны болған әйел сол сұмдық оқиғадан кейін дүниеге келген қызын іздеп жүр. Ол бүгінде шетелдік отбасы асырап алған перзентінің тағдырына алаңдап, жұртшылықтан көмек сұрап отыр,-деп хабарлайды «Dalamedia» ақпараттық порталы.

Қасіретті оқиға Ақжайық ауданының Үшінші ауылында болған. Наталья сол кездегі жағдайды еске алғанда әлі күнге дейін даусы дірілдейді.«Анам екеуміз үйде қалған едік. Ағаларымның бірі оқуда, екіншісі әскерде болатын. Осы сәтті пайдаланған төрт ер адам мені қорлап, азаптады. Соңында Жайық өзенінің жағасына апарып тастап кетті. Есімді жиғанда таң бозғылт тартып келе жатыр екен, үстімде киім жоқ, суықтан қалтырап жатырмын. Сол кезде маған: «Екі-ақ жолың бар, не осы жерде өлесің, не өмір бойы үндемейсің» деп сес көрсетті», – дейді Наталья Қалымбетова.

Әйелдің сөзінше, ол кезде қорғаушысы болмаған, тіпті жағдайды білген туыстары да тіс жармаған. Зорлықтан кейін өмірге келген қызы кейін өзге отбасының қолына өтіп кетіпті.

«Мені қорлаған төрт жігіт әлі күнге дейін аман-есен жүр. Ал мен болсам, жасым елуге таяса да, сол жараның зардабын тартып келемін. Сол түннен кейін жақ сүйегім сынып, денем көгеріп, бірнеше күн сарайда тығылып жаттым. Анама білдірмеу үшін құдықтан су тасып, денедегі іздерді жуып-шайып жүрдім. Қазіргі басты мақсатым – қызымды табу және шындықтың ашылуы», – деп ағынан жарылды ол.
Қазір Наталья Қалымбетова қызын іздеуге көмектесуді сұрап, қоғам назарын өзінің тағдырына аударып отыр.