Жетісу облысының Жаркент қаласында жұрттың жағасын ұстатқан жағдайға қатысты зәбір көрген баланың әкесі алғаш рет оқиғаның қалай өрбігенін айтты. Оның сөзінше, төрт жасар баланы анасы бірнеше ай бойы соққыға жыққан,- деп хабарлайды «Dalamedia» ақпараттық порталы, КТК телеарнасына сілтеме жасап.

Әкенің айтуынша, балаға күш көрсету шамамен үш ай бұрын басталған. Ол ұлының денесіндегі көгерген іздерді байқап, себебін сұрағанда, анасы «інісімен төбелескен» деп түсіндірген. Алайда кейін шындықтың беті ашылған.

Резонанс тудырған соңғы оқиғада әйел баласын кіші дәретін ұстай алмағаны үшін ұрған. Осы жағдайдан кейін әкесі баланың соққыға жығылған сәті түсірілген видеоны әдейі әлеуметтік желіге жариялағанын айтады.

Қазіргі таңда балалармен психологтар жұмыс жүргізіп жатыр. Мамандардың мәліметінше, бүлдіршіннің жағдайы тұрақты, денсаулығы қалыпты. Бұған дейін екі баланың Талдықорған қаласына жеткізілгені хабарланған еді.

Оқиғаға байланысты тексеру жалғасып жатыр. Құзырлы органдар шешімі алдағы уақытта белгілі болады.