Қазақстанда бірқатар шетелдік азық-түлік тауарларын әкелуге уақытша шектеу қойылуы мүмкін. Ауыл шаруашылығы министрлігі ішкі нарықты қорғау үшін демпингтік бағамен сатылып жатқан импорттық өнімдерге қатысты нақты қадамдар қарастырып жатыр.

Ведомствоның мәліметінше, кейбір шетелдік тауарлар Қазақстанда өндірілетін өнімнің өзіндік құнынан да төмен бағамен ұсынылуда. Бұл жағдай отандық өндірушілердің бәсекеге қабілеттілігін әлсіретіп, жергілікті кәсіпорындардың жұмысын тоқтату қаупін арттырады. Ауыл шаруашылығы вице-министрі Аманғали Бердалин мұндай жеткізілімдердің демпингтік сипатта екенін және нарыққа айтарлықтай кері әсер ететінін айтты.

Министрлік әр тауар түрі бойынша жеке-жеке талдау жүргізілетінін хабарлады. Егер импорттық өнімнің бағасы жасанды түрде төмендетілгені дәлелденсе, оны елге әкелуге шектеу қою туралы шешім қабылдануы мүмкін. Шенеуніктердің айтуынша, арзан импорттың ұзақ мерзімді қысымы отандық өндірістің әлсіреуіне әкеледі.

Сонымен қатар, көрші мемлекеттерде ауыл шаруашылығы өнімдері өндірістен бастап тасымалдауға дейін субсидияланатыны атап өтілді. Осы себепті шетелдік тауарлар Қазақстан нарығына жергілікті өнімнен арзан бағамен кіріп отыр. Министрлік мұны отандық фермерлер үшін нақты қауіп деп бағалайды.

Қазір Ауыл шаруашылығы министрлігі Сауда және интеграция министрлігімен бірлесіп, ішкі нарықты қорғаудың жаңа тетіктерін әзірлеуде. Бұған қоса, фермерлерді қолдау шаралары да қарастырылып жатыр. Соның бірі – ет өндірісін ынталандыру мақсатында шопандардың балаларына мерзімді әскери қызметті белгілі бір уақытқа кейінге шегеру мүмкіндігін беру ұсынысы.

Вице-министр бұл бастама әскерден толық босатуды көздемейтінін, тек уақытша кейінге қалдыру екенін нақтылады. Оның айтуынша, мал шаруашылығымен айналысатын отбасыларда ұл балалардың көмегі өндірістің сақталуына тікелей әсер етеді.

Айта кетейік, бұған дейін Қазақстанда әлеуметтік маңызы бар азық-түлік бағасын негізсіз өсірген кәсіпкерлерге 55,7 миллион теңгеден астам айыппұл салынған болатын. Жыл басынан бері 600-ден астам сауда нысаны тексеріліп, мыңдаған әкімшілік қаулы шығарылды. Билік бағаны тұрақтандыру үшін өңірлік қорлар арқылы азық-түлік қорын реттеу жұмыстарын жалғастырып жатыр.