Қазақстандықтар автокөлікке арналған «әдемі» мемлекеттік нөмірлерді алу қызметіне белсенді қызығушылық танытып отыр. Бұл туралы Жасанды интеллект және цифрлық даму вице-министрі Ростислав Коняшкин мәлімдеді.
Оның айтуынша, қызмет іске қосылған алғашқы күннің өзінде ХҚКО-ларға келушілер саны айтарлықтай артқан. Вице-министр мұндай жүктеменің тек жаңа сервистер іске қосылған кезде ғана емес, мерекелерден кейін де жиі байқалатынын атап өтті.
«Кеше автокөліктерге “әдемі” нөмірлерді таңдау қызметі қолжетімді болды. Алдын ала мәлімет бойынша, еліміз бойынша бұл қызметке шамамен 11 мың өтініш түсті», – деді Ростислав Коняшкин.
Сондай-ақ ол аталған қызметті жақын арада eGov мобильді қосымшасы арқылы онлайн форматта іске қосу жоспарланып отырғанын жеткізді. Бұдан бөлек, «Азаматтарға арналған үкімет» мемлекеттік корпорациясы да өз платформасы арқылы қызмет көрсетуді әзірлеу үстінде.