«Қазатомөнеркәсіп» ұлттық компаниясының бұрынғы басшысы Мұхтар Жәкішев қызы Алтынайдың ұзату тойы өткенін хабарлап, әлеуметтік желіде жүрекжарды жазба жариялады, -деп хабарлайды «Dalamedia» ақпараттық порталы.

Кәсіпкердің айтуынша, қызы мен оның таңдауы Карл бір-бірін алты жылдан бері таниды. Екі жыл бұрын жігіт Алматыға арнайы келіп, Алтынайдың қолын сұраған.

Жәкішев қызының бұл шешімі кездейсоқ қабылданбағанын айтып, жастардың қарым-қатынасы шынайы сезімге негізделгенін жеткізді. Сондай-ақ күйеу баласының азаматтық көзқарасы, еңбекқорлығы мен мақсаткерлігі өзіне ұнайтынын атап өтті.

Ол бұл тойдың өзі үшін айрықша мәнге ие болғанын жасырмады. Себебі үлкен қызы тұрмысқа шыққан кезде түрмеде болғандықтан, әкелік қуанышқа ортақтаса алмаған.

«Бүгін бәрі басқаша. Қызыңды өз қолыңмен ұзатып, ақ тілегіңді көзіне қарап айту – үлкен бақыт», – деді ол.

Мұхтар Жәкішев қызының өмір жолына да тоқталды. Оның сөзінше, Алтынай әкесі қамауда болған жылдары туған үйінен жырақта өсіп, шетелде білім алған. Соған қарамастан қиындыққа мойымай, мектеп пен университетті тәмамдап, кәсіби журналист әрі модель ретінде қалыптасқан.

Сондай-ақ кәсіпкер әлеуметтік желіде қызының таңдауы мен күйеу баласының ұлтына қатысты айтылған пікірлерге жауап берді.

«Нағыз намыс адамның ұлтымен өлшенбейді. Ұлттың жаманы болмайды, жаман адамдар болады. Адамды шыққан тегіне қарап емес, ар-ожданы мен адамгершілігіне қарап бағалау керек», – деді Жәкішев.

Ол жаңа құдаларын жоғары бағалайтынын айтып, олардың Ұлыбританияда бірнеше буыннан бері тұрса да, өз ұлттық дәстүрлері мен тамырын ұмытпағанын ерекше атап өтті.