Әйгілі актер Еркебұлан Тоқтар туған інісіне Алматы қаласының орталығынан екі бөлмелі пәтер сыйлап, қуанышты жаңалығын әлеуметтік желіде бөлісті, – деп хабарлайды «Dalamedia» ақпараттық порталы.

Өнер иесінің айтуынша, 5 жыл бұрын қарызға батып жүрген кезінде 300 мың теңге несие алып беруін өтініп, інісіне барған. Сол сәтте бауыры еш ойланбастан қолдау көрсеткен. Актердің сөзінше, сол кезде жасалған көмектің арқасында бүгінгі деңгейге жеткен. Сондықтан бауырының орны өзі үшін ерекше екенін атап өтті.

Қазір інісі үш жерде жұмыс істегенімен, жеке баспана алуға мүмкіндігі болмаған. Ол отбасымен бірге ата-анасының қолында тұрып келген. Еркебұлан Тоқтар бауырына толық дайын, өздеріне ұнайтын ауданнан екі бөлмелі пәтер сатып алып берген.

Актер туған күнін ұмытқан кейіп танытып, алдымен сыйлық ұсынған. Кейін қалтасынан пәтер кілтін шығарып, тосын сый жасаған. Бауыры алғашында өз көзіне өзі сене алмаған. Шын екенін түсінгенде көз жасына ерік берген.

«Осы күнді бес жыл армандадым. Бүгін, Аллаға шүкір, сол арманға жеттім», – деп жазды актер.