Ақмола облысының Щучинск қаласында болған жойқын жарылысты көзімен көрген тұрғын сол кештегі қорқынышты сәттерді айтып берді, – деп хабарлайды «Dalamedia» ақпараттық порталы. Оның сөзінше, оқиға шамамен кешкі сағат 22:00-де болған. Кенеттен жарқ еткен жарық шығып, артынан қатты тарсыл естілген.

Оқиға орнына қарама-қарсы орналасқан барда жұмыс істейтін, аты-жөнін атаудан бас тартқан даяшының айтуынша, сол сәтте бардағы қызметкерлер мен келушілер бірден терезеге ұмтылған. Ғимараттың ішінен от лапылдап шығып, жалын барған сайын күшейе түскен. Көпшілік жағдайдың аса қауіпті екенін аңғарған соң, шұғыл қызметтерге дереу хабар берілген.

Куәгердің сөзінше, маңайдағы тұрақта жүрген адамдар да көмекке жүгірген. Арада аз уақыт өткенде барға тағы бір даяшы келген. Ол сол күні демалыста болса да, досымен бірге “Палау орталығында” отырғанын айтқан. Оның досы бет тұсынан күйік алып, бар менеджері алғашқы медициналық көмек көрсеткен. Сол сәтте ғимараттың түгелдей дерлік отқа оранғаны анық көрінген.

Еске салайық, Щучинск қаласындағы төтенше жағдай салдарынан жеті адам қаза тапты. Денсаулық сақтау басқармасының мәліметіне сәйкес, бес адам оқиға орнында көз жұмған, тағы екеуі 2026 жылғы 26 ақпанда жансақтау бөлімінде қайтыс болды. Қаза тапқандардың арасында 16 жастағы қыз бар. Аталған дерек бойынша қылмыстық іс қозғалып, ТЖД жанынан жедел желі ашылды.