Жаңа жыл түні Түркістан облысы Кентау қаласында орналасқан қымызханадағы жарылыс салдарынан 18 жастағы қызметкер көз жұмды. Қаза тапқан — осы мекемеде жұмыс істеген Дана Сағынғалиқызы.

Алдын ала мәліметке сәйкес, марқұм бұл жұмысқа бір ай бұрын ғана орналасқан. Қайғылы оқиға алдында бірнеше адам ғимарат ішінде газ иісі сезіліп тұрғанын ескерткен. Туыстарының айтуынша, Дана жаңа жыл түні жұмыстан кетуге дайын болған, алайда басшылық «жұмыс қарбалас» деген себеппен оны жібермеген. Сол сәтте марқұмның анасы мен сіңлісі де газдың шығып тұрғанын айтқан.

Жарылыс кезінде тағы төрт адам күйік жарақатын алған. Қазіргі таңда олар ауруханада ем қабылдап жатыр, оның екеуінің жағдайы ауыр деп бағаланып, жансақтау бөлімінде жатыр.

Қаза тапқан бойжеткен екінші курс студенті болған. Жақындары оқиғаға кінәлі тұлғалардың қатаң жауапкершілікке тартылуын талап етуде.

Кентау қаласы әкімдігінің мәліметінше, аталған дерек бойынша қылмыстық іс қозғалып, оқиғаның барлық мән-жайы анықталуда. Сондай-ақ жарылыс салдарынан зақым келген тұрғын үйлерді қалпына келтіру жұмыстары жүргізіледі.