Шымкенттегі №2 қалалық ауруханада ем қабылдаған жүкті әйелдің құрсағындағы сәби жатырда шетінеп кетті. Оқиғаның дер кезінде кесар тілігі жасалмауына байланысты болуы мүмкін деген уәж айтылып отыр.
Оқиға Шымкент қаласындағы №2 қалалық ауруханада тіркелген. Жергілікті тұрғын Назерке Пірімбетова осы медициналық мекемеде босануға тиіс болған. Әйел ауруханада шамамен бір ай бақылауда болған. Осы уақыт аралығында КТГ көрсеткіштері қанағаттанарлықсыз болғаны айтылады.
Сәби шетінеп кеткеннен кейін медициналық мекеме өкілдері бұл жағдайға қатысты нақты түсініктеме бере алмаған. Сонымен қатар пациенттен журналистермен сөйлеспеуі жөнінде өтініш айтылғаны хабарланды.
Цитата:
“КТ тұрақты түрде нашар нәтиже көрсетті. Бұл туралы бірнеше рет ескерттік, бірақ тиісті шара қабылданбады. Нәтижесінде сәбиімізді жоғалттық”, – деді босанған әйелдің күйеуі Абай Бердібек.
Аталған дерек бойынша қылмыстық іс қозғалды. Медициналық қызметкерлердің әрекеттері тексеріліп жатыр. Шетінеген сәбидің денесі, плацента мен кіндік бауы сот-медициналық сараптамаға жолданды. Денсаулық сақтау басқармасының мәліметінше, кесар тілігін жасау жоспарланған, алайда плацента мен оның қан тамырларындағы өзгерістер салдарынан антенаталдық өлім тіркелген.
Тергеу жалғасуда.
DALAMEDIA admin
Бүгін, 21:35
Саясат / Әлем