Түркістан облысында өткен той қайғылы жағдайға ұласа жаздады. Қазығұрт ауданындағы мейрамханалардың бірінде отшашу кезінде төбе тұтанып, залды өрт шарпыды.

Куәгерлердің айтуынша, мерекелік сәтке арналған фейерверк залдың ішінде іске қосылған. Бір сәтте ұшқын төбеге тиіп, жалын тез тараған. Төбенің кей бөлігі опырылып, қонақтардың үстіне құлаған.

Алдын ала мәлімет бойынша, өрттің шығуына отшашу құрылғысындағы электр сымдарының қысқа тұйықталуы себеп болған.

Абырой болғанда, зардап шеккендер жоқ. Құтқарушылар оқиғаның алдын алып, өртті дер кезінде сөндірген. Қазір мейрамхана иесіне қатысты қауіпсіздік талаптарын бұзу дерегі бойынша тексеріс жүргізіліп жатыр.