Осыдан үш ай бұрын АҚШ-қа аттанған Еркебұлан Тоқтар елге оралды. Әйгілі актер, поп-ММА өкілі өз жоспарын өзгеріп Қазақстанға қайтып келді. Өнер иесі Америкаға кезекті жекпе-жегіне дайындалу үшін кеткенін айтқан еді.

Еркебұлан Тоқтар Америкада спаррингтер өткізіп, қарқынды жаттығу жасауды жоспарлаған. Алайда айқас өтпей қалған.

«АҚШ-қа ММА жекпе-жегіне дайындалуға бардым. Онда жаттығатын адам көп, деңгей басқа. Тез өсесің. Бірақ жекпе-жек болмай қалды», – деді Еркебұлан.

Алдағы уақытта ол Арменияда Марсель Нұрланбековпен жұдырықтасады. Бұл жолы дайындық бокс бағытында жүрмек. Спортшының пікірінше, боксқа Қазақстанда да сапалы дайындалуға мүмкіндік бар.

«Марсельмен бокс ережесімен шығамын. Бұл жағынан мені Әлішерден артық дайындайтын адам жоқ деп ойлаймын. АҚШ-та жаттықтырушы іздедім. Бокстың ортасы Лос-Анджелес, ал мен Майамиде болдым. Ол жақта табу қиын. Бізде іздеп әуре болмайсың – екінің бірі боксшы. Сондықтан Алматыға қайттым», – деді ол.

Қазір Еркебұлан Тоқтар медиа кеңістіктегі ең танымал жауынгерлердің біріне айналды. Соңғы жекпе-жегін 27 желтоқсанда Ташкенттегі «Хумо Аренада» өткізіп, өзбекстандық Тимур Никулинді бірінші раундта техникалық нокаутпен жеңген еді.

Бұған дейін спортшы елден уақытша кететінін мәлімдеген болатын.