Қазақстанның еңбек сіңірген қайраткері, “Құрмет” орденінің иегері, актер әрі режиссер Балтабай Сейітмамытұлы 76 жасқа қараған шағында дүниеден озды. Қаралы хабарды Мәдениет және ақпарат министрлігі мәлімдеді.

Министрлік марқұмның отбасы мен туған-туыстарына, барша халқына көңіл айтып, оның ұлттық мәдениетке қосқан еңбегі ел жадында сақталатынын атап өтті.

Балтабай Сейітмамытұлы саналы ғұмырын қазақ сахна өнеріне арнаған көрнекті тұлғалардың бірі. Ол Ғабит Мүсірепов атындағы балалар мен жасөспірімдер театры мен Мұхтар Әуезов атындағы ұлттық драма театрының сахнасында көптеген жарқын бейнелерді сомдап, классикалық әрі заманауи драматургияда өзіндік қолтаңбасын қалдырды.

Өнер иесі 1950 жылы 11 сәуірде Алматы облысы Жамбыл ауданы Қастек ауылында дүниеге келген. “Жүрегім ашық жақсыға” кітабының авторы, бірқатар спектакльдерге арналған рецензиялары да жарық көрген.

Ол И.Есенберлиннің “Ғашықтар”, Е.Ерубаевтың “Менің құрдастарым”, А.П. Чеховтың “Шағала”, Ш. Мұртазаның “Бесеудің хаты”, У.Шекспирдің “Даулы түнгі думан”, М.Әуезовтің “Абай” сынды қойылымдарында есте қаларлық рөлдер орындады.

2002 жылы Қазан қаласында өткен халықаралық Түркітілдес театрлар фестивалінде Иран-Ғайыптың “Қорқыттың көрі” шығармасындағы Қорқыт бейнесі үшін “Ең үздік ер адам рөлі” аталымында жеңімпаз атанып, “Алтын қанатты адам” сыйлығын иеленді.

Балтабай Сейітмамытұлының өнер жолы мен сахнадағы мұрасы қазақ мәдениетінің қазынасында мәңгі қалмақ.