Алматы облысында қайғылы жағдай тіркелді. Қарасай ауданына қарасты Қаскелең қаласындағы Сәтбаев атындағы орта мектепте 9-сыныпта оқитын жасөспірім сабақ үстінде кенеттен қайтыс болды.

Аудандық білім бөлімінің мәліметінше, оқиға алғашқы сабақтан кейінгі үзіліс кезінде болған. 15 жастағы оқушының жағдайы аяқ астынан күрт нашарлаған. Мектеп әкімшілігі бірден жедел жәрдем шақырғанымен, дәрігерлер көрсеткен реанимациялық көмектің еш нәтижесі болмады.

«Жедел жәрдем бригадасы барлық қажетті медициналық шараны қолданды. Алайда баланың өмірін сақтап қалу мүмкін болмады. Оқушы оқиға орнында көз жұмды. Бұл – отбасы үшін де, мектеп ұжымы үшін де ауыр қаза», – деп хабарлады Қарасай аудандық білім бөлімі.

Қазіргі таңда оқиғаның нақты себебін анықтау үшін құзырлы органдар тексеру жұмыстарын бастап кетті. Марқұмның денесі сот-медициналық сараптамаға жіберілген. Алдағы уақытта тергеу нәтижесі бойынша қосымша ақпарат берілмек.

Айта кетейік, бұған дейін Ақтөбе облысында мектеп оқушысының өліміне қатысты іс қоғамда кең резонанс тудырған еді. Сол іс бойынша сотталған бірнеше жасөспірімге берілген жаза кейін шартты жазаға ауыстырылған болатын.