Атырауда қалалық емханаға келген төрт айлық сәби қабылдау кезінде кенеттен тыныс алмай, өміріне қауіп төнді. Дәрігерлердің жедел әрі үйлесімді әрекетінің арқасында бала аман қалды. Бұл туралы Атырау қалалық денсаулық сақтау бөлімінің баспасөз қызметі хабарлады.

Оқиға анасы баласын емізіп отырған сәтте болған. Сәби бір мезетте тынысын тоқтатып, терісі көгере бастаған. Жағдайы күрт нашарлаған баланы дәрігерлер дереу бақылауға алып, шұғыл көмек көрсетті.

Медицина қызметкерлерінің айтуынша, невропатолог апноэ ұстамасын анықтаған. Сәбиге оттегі терапиясы жүргізіліп, ауыз қуысына санация жасалды. Сонымен қатар ішкі қысымды азайту үшін газ шығару түтікшесі орнатылған. Көрсетілген көмектен кейін баланың тынысы біртіндеп қалпына келіп, жылап, оттегі қанығуы 74 пайыздан 84 пайызға дейін көтерілген.

Жедел жәрдем келген соң сәби облыстық балалар ауруханасына жеткізіліп, толық тексеру мен дәрігерлік бақылауға алынды. Бұл туралы Атырау қалалық денсаулық сақтау басқармасының баспасөз қызметі хабарлады.