Бүгін Алматы қаласында қазақ өнерінің көрнекті өкілі, Халық әртісі, Қазақстанның Еңбек Ері Асанәлі Әшімовті соңғы сапарға шығарып салу рәсімі өтіп жатыр. Қаралы жиынға еліміздің жоғары лауазымды тұлғалары, мемлекет және қоғам қайраткерлері, зиялы қауым өкілдері мен қала тұрғындары жиналды.

Қоштасу рәсіміне Мемлекеттік кеңесші Ерлан Қарин, Премьер-министрдің орынбасары – Мәдениет және ақпарат министрі Аида Балаева, Алматы қаласының әкімі Дархан Сатыбалды, сондай-ақ мәдениет саласының белгілі өкілдері қатысып, марқұмның отбасы мен жақындарына көңіл айтты.

Асанәлі Әшімов – қазақ киносы мен театрының дамуына өлшеусіз үлес қосқан тұлға. Ол сомдаған бейнелер ұлттық өнердің алтын қорына енді. Өнер иесінің шығармашылық жолы бірнеше буын актерлеріне үлгі болып, көрерменнің зор құрметіне ие болды. Оның қатысуымен түсірілген фильмдер мен сахналық қойылымдар қазақ мәдениетінің айнасына айналды.

Қаралы жиын барысында марқұмның ел мәдениетіне сіңірген еңбегі ерекше аталып, оның жарқын бейнесі халық жадында мәңгі сақталатыны айтылды. Қала тұрғындары мен өнерсүйер қауым Асанәлі Әшімовпен қоштасып, рухына тағзым етуде.