2025 жылдың 26 шілдесінен бастап Алматыда Жастар саясаты басқармасының қолдауымен Skill All атты әлеуметтік білім беру жобасы жүзеге асуда. Мақсаты – жастарды заманауи, еңбек нарығында сұранысқа ие мамандықтар бойынша тегін оқытып, олардың жұмыспен қамтылу мүмкіндіктерін арттыру.

Бес айдың ішінде 16–35 жас аралығындағы 2 мыңнан астам алматылық жоба курстарын аяқтаған. Оқытудың ұзақтығы 2 аптадан 5 аптаға дейін созылады. Бағдарлама IT, SMM, бариста ісі, кондитерлік өнер, риэлторлық сияқты әртүрлі бағыттарды қамтиды. Мұндай кең ауқым жастарға өз қызығушылығына сай мамандық таңдап, цифрлық дағдылардан бастап қолданбалы кәсіптерге дейін меңгеруге мүмкіндік береді.

Жоба қатысушылары тәжірибелі мамандармен бірге жұмыс істеп, нақты тапсырмаларды орындайды. Бұл тәсіл оқыту барысында бірден тәжірибе жинауға және нарық жағдайына бейімделуге жағдай жасайды. Курсты сәтті аяқтағандарға біліктілікті растайтын сертификат беріледі.

Skill All бүгінде мемлекеттік қолдау мен жастар бастамаларының үйлесуі арқылы жас алматылықтардың өмірін айтарлықтай өзгертіп жатқан жарқын мысалдардың біріне айналды. Жоба тек білім беріп қана қоймай, жастардың өз әлеуетін жүзеге асырып, еңбек нарығында сенімді орын табуына жол ашуда.