Қазақстанда қызметкерлерге жарты жылға дейін ақылы демалыс беру мүмкіндігін қарастыратын жаңа норма енгізілуі мүмкін. Бұл бастама Еңбек кодексіне ұсынылған өзгерістер аясында көтеріліп отыр, — деп хабарлайды «Dalamedia» ақпараттық порталы.

Сенатта талқыланған «Еңбек заңнамасын жетілдіру туралы» заң жобасында жұмысын оқуымен немесе ғылыми ізденіспен қатар алып жүрген азаматтарға ұзақ мерзімді оқу демалысын беру көзделген. Егер құжат қабылданса, мұндай демалыстың ұзақтығы алты айға дейін жетуі ықтимал.

Қазіргі таңда оқу демалысы көбіне емтихан тапсыру, диплом қорғау немесе зертханалық жұмыстарды орындау кезеңінде ғана беріледі. Ал жаңа түзетулер бұл мүмкіндікті кеңейтуді көздейді. Енді қызметкерлер оқу демалысын әскери даярлық резервінен өтуге, ғылыми зерттеу жүргізуге, диссертация жазып, қорғауға және өзге де ғылыми жұмыстармен айналысуға пайдалана алады.

Сонымен қатар заң жобасында оқу демалысының ең ұзақ мерзімі алты айдан аспауы тиіс екені нақты көрсетілген. Қажет болған жағдайда, жұмыс беруші мен қызметкердің келісімі арқылы бұл уақытты бөліп-бөліп алу мүмкіндігі де қарастырылған.

Маңызды жаңалықтың бірі — демалыс кезінде қызметкердің жұмыс орны, атқарып отырған қызметі және орташа жалақысы толық сақталуы тиіс. Бұған дейін мұндай кепілдіктер заңда нақты бекітілмегендіктен, көбіне жұмыс берушінің шешіміне тәуелді болып келген.

Ал «Болашақ» халықаралық бағдарламасына қатысушылар үшін бөлек талаптар қарастырылған. Олардың жұмыс орны сақталғанымен, шетелде оқу немесе тағылымдамадан өту кезеңіндегі жалақы мәселесін жұмыс беруші өзі шешеді.

Заң жобасына берілген түсіндірмеде жұмыс пен ғылыми ізденісті қатар алып жүру, әсіресе оқу жүктемесі жоғары кезеңдерде, оңай емес екені атап өтіледі. Осыған байланысты ұсынылып отырған өзгерістер қызметкерлерге білім мен ғылымға көбірек көңіл бөлуге мүмкіндік бермек.

Айта кетейік, бұған дейін елде қызметкерлерге жұмыс уақытында медициналық тексеруден өтіп, жалақысын сақтауға рұқсат беру мәселесі де көтерілген болатын.