Қазақстанда енді бала күтімі үшін декрет демалысына шыққан әкелердің де уақыты еңбек өтілі ретінде есептелетін болады. Жаңа заң нормаларына сәйкес, кәмелетке толмаған баласына өзі күтім жасаған, бірақ ресми түрде жұмыс істемеген ер азаматтардың бұл кезеңі зейнетақы тағайындау кезінде еңбек өтіліне қосылады.

Аталған өзгерістер Конституциялық соттың шешімін орындау мақсатында Әлеуметтік кодекске енгізілмек.

Сонымен қатар депутаттардың ұсынысымен жұмыс берушілерге жалғызбасты ата-аналарды өз бастамасымен жұмыстан шығаруға тыйым салу қарастырылып отыр. Осыған байланысты заң мәтініндегі “жалғызбасты аналар” деген ұғым енді “жалғызбасты ата-ана” деп өзгертіледі. Бұл норма әйелдерге де, ер адамдарға да бірдей қолданылады.

Бұдан бөлек, мәслихаттарға “Облыстың, қаланың немесе ауданның Құрметті азаматы” атағын беру тәртібін әзірлеу және бекіту құқығы беріледі.

Жаңа түзетулер әлеуметтік әділеттілікті күшейтіп, ата-аналардың құқықтарын тең қорғауға бағытталған.