Қазақстанда микро және шағын бизнеске түсетін салықтық жүктемені жеңілдету мақсатында бірқатар маңызды шешім қабылданды. Бұл туралы Үкімет отырысында қаржы вице-министрі Ержан Біржанов мәлімдеді.
Оның айтуынша, жаңа Салық кодексіне көшу кезеңінде кәсіпкерлерге қосымша қысым көрсетілмейді. Бизнеске бейімделу үшін уақыт беріледі, ал өткен жылдардағы қателіктер үшін жаппай жауапкершілік қолданылмайды.
Атап айтқанда, микро және шағын кәсіпкерлер қосылған құн салығы (ҚҚС) бойынша тіркеуге уақытында тұрмағаны үшін әкімшілік жауапкершіліктен босатылады. Бұл мәселе бұған дейін салық органдары мен кәсіпкерлер арасында жиі дау туғызған.
Сонымен қатар 2026 жылдан бастап негізгі салық қарызы өтелген жағдайда айыппұл мен өсімпұлды есептен шығару тетігі енгізіледі. Бұл қадам кәсіпкерлердің қаржылық жағдайын тұрақтандыруға бағытталған.
Маңызды өзгерістердің бірі – алдыңғы салық кезеңдеріне қатысты бақылау мен тексерулердің тоқтатылуы. Қаржы министрлігінің мәліметінше, 2026 жылы 2023, 2024 және 2025 жылдарға қатысты камералдық бақылау жүргізілмейді. Сондай-ақ бұл кезеңдер бойынша тексеру де, сотқа жүгіну де болмайды.
«Біз кәсіпкерлерге жаңа кезеңді таза парақтан бастауға мүмкіндік беріп отырмыз», – деді Ержан Біржанов.
Еске салайық, Қазақстанда жаңа Салық кодексі 2026 жылдың 1 қаңтарынан бастап күшіне енеді. Үкімет бұл өзгерістер шағын және орта бизнестің тұрақты жұмыс істеуіне және салық реформасының әлеуметтік-экономикалық салдарын жұмсартуға бағытталғанын атап өтті.
DALAMEDIA admin
Бүгін, 15:00
Қоғам