2026 жылдан бастап Қазақстанда зейнетақылар мен мемлекеттік жәрдемақылардың барлық түрі 10%-ға артады. Бұл норма 2026–2028 жылдарға арналған республикалық бюджет туралы заңда қарастырылған.
Еңбек және халықты әлеуметтік қорғау министрлігінің мәліметінше, 2026 жылғы 1 қаңтардан бастап базалық және ынтымақты зейнетақылар инфляцияның болжамды деңгейіне сай 10%-ға ұлғайтылады.
Сонымен қатар, Мемлекет басшысының тапсырмасына сәйкес, базалық зейнетақыны кезең-кезеңімен арттыру жалғасады:
• ең төменгі мөлшері – күнкөріс деңгейінің 70%-ы,
• ең жоғарғысы – 120%-ы.
2026 жылғы базалық зейнетақы мөлшері:
• Ең төменгісі – 35 596 теңге
• Ең жоғарғысы – 60 005 теңге
Нақты мысал
2019 жылы зейнетке шыққан, 70 жастағы зейнеткер:
• 2025 жылы – 171 588 теңге
• 2026 жылы – 192 816 теңге
(Бұл сомаға БЖЗҚ-дан төленетін зейнетақы кірмейді)
Жәрдемақылар да өседі
2026 жылдан бастап барлық мемлекеттік жәрдемақылар 10%-ға ұлғаяды.
Бала тууға берілетін біржолғы төлем:
• 1–3 бала – 164 350 теңге
• 4 және одан көп бала – 272 475 теңге
Көпбалалы отбасыларға:
• 4 бала – 69 330 теңге
• 10 бала – 173 000 теңге
Мүгедектігі бар адамдарға:
• I топ – 111 872 теңге
• II топ – 89 498 теңге
• III топ – 61 021 теңге
Әлеуметтік төлемдер де көбейеді
Мемлекеттік әлеуметтік сақтандыру қорынан төленетін:
• асыраушысынан айырылу,
• еңбекке қабілетінен айырылу бойынша төлемдер де 10%-ға артады.